बार्सिलोनाका प्रशिक्षक जाभीले बोली फेरेका छन्। केही साताअघि मात्र सिजनको अन्त्यसँगै बार्सिलो छोड्ने घोषणा गरेका जाभीले बोली फेर्दै अझै एक सिजन बार्सिलोनमै रहने निर्णय गरेका छन्।
४४ वर्षीय जाभीले अझै सन् २०२५को जुनसम्म क्याम्प नाउमै रहने निर्णय गरेका हुन्। क्लबको नयाँ प्रस्ताव मन परेको भन्दै जाभीले क्लब छाड्ने आफ्नो निर्णय बदल्दै सम्झौता अवधिभर क्लबमै रहने निर्णय गरेका हुन्।
बार्सिलोनाका पूर्वखेलाडी जाभी नोभेम्बर २०२१ मा प्रशिक्षक नियुक्त भएका थिए । उनले २०२२–२३ मा क्लबलाई ला लिगाको उपाधि समेत जिताएका छन्। तर, यो सिजन भने बार्सिलोना उपाधिबिहीन हुनेछ।
बार्सिलोना च्याम्पियन लिगको क्वाटरफाइनलमा पिएसजीसँग पराजित हुँदै बाहिरिएको छ भने ला लिगामा पनि शीर्ष स्थानको रियल मड्रिडभन्दा ११ अंकले पछि छ। केही दिनअघि मात्र बार्सिलोना रियलसँग पराजित भएको थियो।