राजस्थान रोयल्स आईपिएलका क्लालिफायर्समा प्रवेश गरेको छ। तेस्रो हुँदै प्लेअफमा पुगेको राजस्थान बिहीबार राति नरेन्द्र मोदी स्टेडियममा भएको एलिमिनेटरमा रोयल च्यालेन्जर्स बेंग्लुरलाई ४ विकेटले हराउँदै दोस्रो क्वालिफायरमा पुगेको हो।
अब क्वालिफायरमा उसले सनलाइसर्ज हैदरावादसँग खेल्नेछ। लिगमा दोस्रो हुँदै क्वालिफायरमा पुगेको हैदारावाद पहिलो क्वालिफायरमा कोलकाता नाइट राइडर्ससँग पराजित भएको थियो।
पहिला ब्याटिङ गर्दै बेंग्लुरले दिएको १७३ रनको लक्ष्य राजस्थानले ६ विकेटको क्षतिमा १९ ओभरमै भेट्टायो। उसका लागि ओपनर यशस्वी जैसवालले सर्वाधिक ४५ रन बनाए। उनले बलमा ८ चौका प्रहार गरे।
यस्तै, रियान परागले २० बलमा समान २ चौका र छक्का प्रहार गर्दै ३६ रन बनाउँदा सिमरन हेटमायरले २६ र टम कोहलर क्याडमोरले २० रन बनाए। बलिङमा बेंग्लुरका मोहम्मद सिराजले २, लोकी फर्गुसन, करण शर्मा र क्यामरन ग्रीनले समान १ विकेट लिए।
त्यसअघि पहिला ब्याटिङ गरेको बेंग्लुरले ८ विकेट गुमाएर १७२ रन बनाएको थियो। रजत पतिदरले ३४, विराट कोहलीले ३३, महिपाल लोम्रोले ३२ र क्यामरन ग्रीनले २७ रन जोडेका थिए।
राजस्थानका आवेश खानले ३, रविचन्द्रण आश्विनले २, ट्रेन्ट बोल्ट, सन्दीप शर्मा र युजभेन्द्र चहलले समान १ विकेट लिए।
दोस्रो क्वालिफायर खेल शुक्रबार हुनेछ। यो खेल जित्ने टोलीले आइतबार कोलकातासँग फाइनल खेल्नेछ।