गोपीचन्द्रले जिते नेपालगञ्ज म्याराथनको उपाधि

एपीएफ क्लबका गोपीचन्द्र पार्कीले छैटौं नेपालगञ्ज म्याराथनको उपाधि जितेका छन् । शनिबार नेपालगञ्जमा सम्पन्न म्याराथन गोपीचन्द्रले निर्धारित ४२.१९५ किलोमिटर दुरी २ घन्टा १८ मिनेट ५९ सेकेन्डमा पुरा गरे ।

उपाधिसँगै गोपीले नगद ७५ हजार प्राप्त गरे । म्याराथनको उपाधि जित्दै गोपीचन्द्र अर्को वर्ष जापानमा हुने टोकियो ओलम्पिकमा छनोट भएका छन् । कोरोना महामारीका कारण अन्य प्रतियोगिता आयोजना नहुँदा नेपाल ओलम्पिक कमिटीले नेपालगञ्ज म्याराथनको विजेतालाई ओलम्पिकमा सहभागिता गराउने निर्णय गरेको थियो ।

क्लब त्रिभुवन आर्मीका कृष्ण बस्नेतले २ घन्टा २० मिनेट ४९ सेकेन्डमा पुरा गर्दै दोस्रो स्थान प्राप्त गरे । आर्मीकै खगेन्द्र भाटले २ घन्टा २७ मिनेट २८ सेकेन्डमा पुरा गर्दै तेस्रो भए । गतवर्षको विजेता आर्मीकै नवराज साउद चौथो भए । उनलेले २ घन्टा ३१ मिनेट २१ सेकेन्डमा दौड पूरा गरे ।

दोस्रो भएको बस्नेतले ३० हजार तथा तेस्रो भएको खगेन्द्र भाटले २० हजार रुपैयाँ प्राप्त गरे । चौथो भएको साउदले १०, पाँचौं भएको ज्ञानप्रसाद भट्टराईले ८, छैटौंले ७, सातौंले ६ र आठौं हुनेले ५ हजार रुपैयाँ प्राप्त गरे ।

यसैगरी महिला हाफ म्याराथनको उपाधि एपीएफकी पुष्पा भण्डारीले जितिन् । १३औं सागको हाफ म्याराथनमा रजत पदक जितेकी पुष्पाले निर्धारित दुरी १ घण्टा २६ मिनेट ५४ सेकेन्डमा पूरा गर्दै उपाधि जितेकी हुन् ।

कर्णाली प्रदेशकी मन्जु रावत १ घण्टा ३० मिनेट ७ सेकेन्डमा दौड पूरा गर्दै दोस्रो भइन् भने शर्मिला धर्तीले १ घण्टा ३८ मिनेट १४ सेकेन्डमा पूरा गर्दै तेस्रो स्थान हासिल गरिन् ।

Leave a Reply

Your email address will not be published. Required fields are marked *

CLICK HERE TO SKIP