केपी ओली कप नकआउट फुटबल प्रतियोगिताको तालिका सार्वजनिक भएको छ। आयोजक युवा संघ नेपालले आइतबार प्रतियोगिताको तालिका सार्वजनिक गरेको हो।
प्रतियोगितामा ७ ए डिभिजन र १ आयोजक गरी कुल ८ टिम सहभागी छन्।
फागुन ११ गतेदेखि हुने प्रतियोगिताको उद्घाटन खेलमा सातदोबाटो युथ क्लब र नेपाल पुलिस क्लब भिड्ने छन्। यस्तै, दोस्रो दिन त्रिभुनव आर्मी क्बलले न्युरोड टिम एनआरटीको सामाना गर्नेछ।
फागुन १२ गते नै मच्छिन्द्र क्लब र चर्च ब्वाइजबीच प्रतिस्पर्धा हुनेछ । १३ गते केपी ओली फुटबल क्लब र जाउलाखेल युथ क्लबबीच प्रतिस्पर्धा हुनेछ।
पहिलो र दोस्रो खेलको विजेताले १४ गते पहिलो सेमिफाइनल खेल्ने छन् । तेस्रो र चौथो खेलको विजेताबीच फागुन १५ गते खेल हुने छ । यी सबै खेल एन्फा कम्लेक्स सातदोबाटोमा हुने छन् । तर फाइनल खेल भने फागुन १७ गते दशरथ रंगशालामा हुनेछ ।
आयोजकका अनुसार प्रतियोगिताको केपी ओली कपको विजेताले १० लाख तथा उपविजेता टोलीले ५ लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १ लाख तथा उत्कृष्ट गोलरक्षक, उत्कृष्ट गोलकर्ता र उदीयमान खेलाडीलाई समान ५० हजार रुपैयाँ प्रदान गरिनेछ।
आयोजकले प्रत्येक खेलको विजेता टोलीलाई २५ हजार तथा हरेक खेलको म्यान अफ द म्याचलाई १५ हजार रुपैयाँ पुरस्कार प्रदान गर्ने बताएको हो।
