मोडल मिस पबी नेपाल सुपर लिग (एनएसएल) क्लब धनगढी एफसीको ब्रान्ड एम्बासडर बनेकी छिन्।
मिस पवी एक सिजनका लागि धनगढी एफसीको ब्रान्ड एम्बासडर बनेकी हुन्। धनगढी एफसीका सीईओ सकुश केसी र पवीले सम्झौता पत्रमा हस्ताक्षर गरेका छन्।
धनगढी एफसीको ब्रान्ड एम्बासडर नियुक्त भएपछि मिस पवीले एकदमै उत्साहित भएको बताइन्। उनले भनिन्, ‘धनगढी एफसीको ब्रान्ड एम्बासडरका रुपमा जोडिन पाउँदा म एकदमै उत्साहित छु। कहिले दशरथ रंगशालामा खेल होला र कहिले खेल हेर्न जाउला भनेर आतुर पनि भैसकेँ।’
धनगढी एफसीका सीईओ केसीले सुदूरपश्चिम र कर्णाली प्रदेशको प्रतिनिधत्त्व गरिरहेको धनगढी एफसीको ब्रान्ड एम्बास्डरको रुपमा सोही क्षेत्रकै लोकप्रिय कलाकार मिस पवीलाई ब्रान्ड एम्बासडरको रुपमा पाउँदा खुशी व्यक्त गरे।
नेपाल सुपर लिगको दोस्रो संस्करण आगामी मंसिर ८ देखि पुस २१ गतेसम्म काठमाडौंको दशरथ रंगशालामा हुँदैछ। धनगढी एफसीले आफ्नो पहिलो खेल आगामी नोभेम्बर २६ तारिखमा वीरगञ्ज युनाइटेडसँग खेल्ने तालिका छ।