पहिलो पटक आयोजना हुन लागेको फ्रन्चाइ कबड्डी नेपाल कबड्डी लिग (एनकेएल)को तालिका सार्वजनिक भएको छ।
एनकेएल माघ ४ गतेदेखि सुरू हुने छ। एस्ट्रोनिक्स म्यानेजमेन्टले आयोजना गर्न लागेको एनकेएलको उद्घाटन खेलमा काठमान्डु माभरिक्स र पोखरा लेकर्सबीच प्रतिस्पर्धा हुनेछ। खेला साँझ ६ः३० बजे सुरु हुनेछ।
दोस्रो दिनबाट दुई खेल हुनेछ। जसमा विराटनगरले पहिलो खेलमा धनगढी वाइल्डक्याट्स भीड्दा दोस्रो खेलमा जनकपुर नाइट्सले बुटवलको हिमालयन रेइडर्सविरुद्ध प्रतिस्पर्धा गर्नेछ।
त्रिपुरेश्वरस्थित राखेप कभर्ड हलमा हुने लिगमा दुई खेल हुँदा पहिलो खेल ५ः३० बजे र दोस्रो खेल ६ः३० बजे सुरू हुनेछ।
६ टिम एनकेएलमा राउन्ड रोबिन लिगमा १५ खेल हुनेछ, जसको शीर्ष चार टिम नकआउट चरणमा प्रवेश गर्नेछन्। लिगका शीर्ष दुई टिमले माघ १४ गते क्वालिफायर १ खेल्नेछ, जसको विजेता सिधै फाइनलमा पुग्नेछ।
लिगमा तेस्रो र चौथो स्थानमा रहेका टिमले माघ १४ गते नै एलिमिनेटरमा खेल्नेछ, जसको विजेता क्वालिफायर २ मा पुग्नेछ। क्वालिफायर १ मा पराजित भएका टिम र एलिमिनेटरका विजेताबीच माघ १६ गते हुने क्वलिफायर २ मा जित हासिल गर्ने टिमले फाइनलमा स्थान पाउनेछ। फाइनल खेल माघ १८ गते हुनेछ।
