काठमाडौं, माघ १८ : नेपालमा भएको आईसीसी महिला टी–२० विश्वकप ग्लोबल छनोटकोे उपाधि बंगलादेशले जितेको छ। उसले अपराजित रहँदै उपाधि जितेको हो।
आइतबार भएको सुपर सिक्सको अन्तिम खेलमा नेदरल्यान्ड्सलाई ७ विकेटले हराउँदै बंगलादेश अपराजित रहँदै च्याम्पियन बनेको हो। यसक्रममा उसले समूह चरणमा ४ र सुपर सिक्समा ३ वटै खेल जित्यो।
नेदरल्यान्ड्सले दिएको १०३ रनको लक्ष्य बंगलादेशले २० बल बाँकी छँदै ३ विकेटको भेट्टायो। त्यसअघि पहिले ब्याटिङ गरेको नेदरल्यान्ड्सले २० ओभरमा ७ विकेट गुमाएर १०२ रन बनाएको थियो।
आइतबार नै भएको अर्को खेलमा आयरल्यान्डले थाइल्यान्डलाई पराजित गरेको छ। योसँगै आयरल्यान्ड पनि विश्वकपका लागि छनोट भएको छ । आयरल्यान्डले दिएको १२२ रनको लक्ष्य पछ्याएको थाइल्यान्ड ५९ रनमा अलआउट भयो।
सुपर सिक्समा शून्य अंकबाट सुरुवात गरेको थाइल्यान्डले कुनैपनि खेल जित्न नसक्दा बाहिरिसकेको छ।
अब स्कटल्यान्ड र अमेरिकामध्ये आज हुने खेलको विजेता टोली विश्वकपमा छनोट हुनेछ।