लगातार खराब प्रर्दशन गरिरहेको नेपाली राष्ट्रिय फुटबल टिम फिफा वरियतामा ओरालो झरिरहेको छ। विश्वकप छनोटमा खराब प्रदर्शन गरेको नेपाली टिम फिफाको नयाँ वरियतामा ३ स्थान तल झरेको छ।
१७५औं स्थानमा रहेको नेपाल ३ स्थान तल झर्दै १७८ मा आइपुगेको छ।
२ साताअघि मात्र भएको छनोटमा नेपाल बहराइनसँगका दुवै खेलमा पराजित भएको थियो। नेपालले पहिलो खेल ५–० र दोस्रो खेल ३–०ले गुमाएको थियो।
त्यसअघि भएका छनोटका २ खेलमा नेपाल यमन र युएईसँग पनि पराजित भएको थियो। विश्वकप छनोटका ४ खेलमा १४ गोल खाएको नेपालले १ गोल पनि गर्न सकेको छैन।
दक्षिण एसियामा भारत शीर्ष स्थानमा छ। तथापी भारतको पनि फिफा वरीयतामा भने गिरावट आएको छ। ११७ स्थानबाट ४ स्थान घटुवा हुँदै १२१ औं स्थानमा आएको हो।
माल्दिभ्स १६१औं स्थानमा रहँदै दक्षिण एसियामा दोस्रो स्थानमा रहेको छ । नेपाल दक्षिण एसियामा तेस्रो स्थानमा छ । बंगलादेश १८४औं स्थान, भुटान १८५औं, पाकिस्तान १९५औं र श्रीलंका २०४औं स्थानमा छ ।