चौथो दक्षिण एसियाली जुयिनर एथलेटिक्स च्याम्पियनसिपमा नेपालका अजय बिकले कांस्य पदक जितेका छन्।
भारतको चेन्नई तमिलनाडुमा भइरहेको प्रतियोगितामा अजयले ३ हजार मिटर दौडमा उक्त पदक जितेका हुन्। उनले ९ मिनेट ०८.९१ सेकेन्डमा दौड पूरा गरेका थिए।
९ प्रतिस्पर्धी रहेको यस स्पर्धामा स्वर्ण र रजत दुवै भारतीय खेलाडी शारुक खान र मोहित चौधरीले जितेका थिए। शारुकले ८ मिनेट २६.०६ सेकेन्डबाट स्वर्ण जित्दा मोहितले ८ मिनेट २७.६१ सेकेन्डबाट रजत जिते।
महिलातर्फ ३ हजार मिटर दौडमा नेपालकी अस्मिता भुजेल थोरै टाइमिङले कांस्य जित्नबाट वञ्चित भइन । उनले चौथो स्थानमा दौड पूरा गर्दा १० मिनेट ४६.१५ सेकेन्डको समय निस्केको थियो।
कांस्य जितेकी श्रीलंकन धाविका दुलान्जीले १० मिनेट ३९.३९ सेकेन्ड लगाइन्। पहिलो र दोस्रो स्थान भारतीय खेलाडीले हात पारे।
आज सकिने प्रतियोगितामा नेपालका ५ पुरुष र ४ महिला खेलाडीले भाग लिइरहेका छन्।