फियोरेन्टिनालाई हराउँदै इन्टर सिरि एको शीर्ष स्थानमा

एन्टोनियो कोन्टेको प्रशिक्षणमा रहेको इन्टर मिलान इटालियन सिरि एको शीर्ष स्थानमा उक्लिएको छ । शुक्रबार राति भएको खेल फियोरेन्टिनालाई उसकै मैदानमा २–०ले हराउँदै इन्टर शीर्ष स्थानमा उक्लिएको हो ।

फियोरेन्टिनाविरुद्ध इन्टरलाई जित दिलाउन निकोल बरेला र इभान पेरिसिचले गोल गरे । इन्टरले दुवै हाफमा समान १ गोल गरेको थियो । बरेलाले ३१औं मिनेटमा गोल गर्दै इन्टरलाई सुरुवाती अग्रता दिलाएका थिए । ५२औं मिनटमा पेरिसिचले गोल गर्दै २–० को जित सुनिश्चित गरे ।

खेलमा ५५ प्रतिशत बल पोजेसन बनाएको इन्टरले फियोरेन्टिनाको पोस्टमा १४ सट प्रहार गर्दा ६ सट फ्रेममा थियो । यता, फियोरेन्टिनाले १५ सट प्रहार गर्दा ३ सट फ्रेममा थियो ।

जितसँगै इन्टर शहरकै अर्को टिम एसी मिलान १ अंकले पछि पार्दै शीर्ष स्थानमा उक्लियो । इन्टरको २१ खेलमा ४७ अंक छ भने एक खेल कम खेलेको एसी मिलानको ४६ अंक छ ।

यता हारको सामना गरेको फियोरेन्टिना २२ अंकका साथ १२औं स्थानमा छ ।

Facebook Comments Box

Leave a Reply

Your email address will not be published.