कप्तान अनिल साहको अर्धशकका बाबजुद नेपाल ए टिम चौथो टि–२० खेलमा पराजित भएको छ। आइतबार साँझ भारतको गुवाहाटीमा भएको खेलमा नेपाल १८ रनले पराजित भयो।
१७५ रनको लक्ष्य पछ्याएको नेपाल ‘ए’ले २० ओभरमा ९ विकेट गुमाएर १५६ रन मात्र बनाउन सक्यो। नेपालका लागि कप्तान अनिल साहले सर्वाधिक ६७ रन बनाए। उनले ५० बलमा ७ चौका र २ छक्का प्रहार गरे।
यस्तै, इशान पाण्डेले २० बलमा २७ रन बनाउँदा अन्यले भने गतिलो योगदान दिन सकेनन्। बलिङमा आसामका अभिनव चौधरी र अब्दुल कुरेशीले समान ३ विकेट लिए। भने सादिक हुसेनले १ विकेट लिए ।
त्यसअघि टस जितेर पहिले ब्याटिङ गरेको आसामले २० ओभरमा ५ विकेट गुमाएर १७४ रन बनाएको थियो । आसामका लागि कप्तान सुमित घडिअन्करले सर्वाधिक अविजित ७० रन बनाए। उनी २०औं ओभरको पहिलो बलमा रिटायर्ड भए।
नेपालका आकाश चन्दले २ विकेट लिँदा बसिर अहमदले १ विकेट लिए ।
योसँगै सिरिज २–२को बराबरीमा आएको छ। अब सोमबार हुने अन्तिम खेल शृंखलामा निर्णायक बन्ने भएको छ।