पाकिस्तानविरुद्धको पाँच खेलको टी–२० सिरिजमा न्युजिल्याण्डले ४–० को अग्रता बनाएको छ। शुक्रबार क्राइस्टचर्चमा भएको खेलमा न्युजिल्याण्डले पाकिस्तानलाई ७ विकेटले पराजित गरेको हो।
पाकिस्तानले दिएको १५९ रनको लक्ष्य न्युजिल्याण्डले १८.१ ओभरमा ३ विकेटको क्षतिमा भेट्टायो।
माथिल्लो क्रमलाई सस्तैमा गुमाएपछि दबाबमा आएका न्युजिल्यान्डलाई जित दिलाउन ड्यारिल मिचेल र ग्लेन फिलिप्सले अर्धशतकीय योगदान दिए।
मिचेलले ४४ बलमा ७ चौका र दुई छक्का प्रहार गर्दै नट आउट ७२ रन बनाए भने फिलिप्सले ५२ बलमा ५ चौका र तीन छक्का सहित नटआउट ७० रन बनाए।
न्युजिल्याण्डले गुमाएका तीन वटै विकेट कप्तान शाहिन अफ्रिदीको नाउँमा रह्यो ।
त्यसअघि पहिला ब्याटिङ गरेको पाकिस्तानले मोहम्मद रिजवानको उत्कृष्ट ब्याटिङ मद्दतमा ५ विकेटको क्षतिमा १५८ रन बनाए। रिजवानले ६३ बलमा ६ चौका र २ छक्का मद्दतमा ९० रन बनाए। यस्तै, मोहम्मद नवानले २१ र बाबर अजामले १९ रन बनाए।
बलिङमा न्युजिल्यान्डका म्यानट हेनरी र लोकेइ फर्गुसनले समान २ विकेट लिए।