सबै खेल 
नेपाल एसिसी वुमन्स प्रिमियर कप २०२४ को सेमिफाइनलबाटै बाहिरिएको छ। शुक्रबार भएको खेलमा नेपाल घरेलु टोली मलेसियासँग ४ विकेटले पराजित भयो। यो पराजयसँगै नेपालको एसिया कप खेल्ने सम्भावना समाप्त भएको छ।
११६ रनको लक्ष्य मलेसियाले १९.५ ओभरमा ६ विकेट गुमाउँदै भेट्टायो। मलेसियाको जितमा एल्सा हन्टरले ५३ बलमा ६ चौकासहित ६९ रनको अविजित इनिङ खेल्दै टोलीलाई जिताइन्।
यस्तै, मास एलिसा १३, महिराह इजाती १६ र वान जुलिया ११ रनमा आउट भइन्। नेपालको सीता रानामगरले ४ ओभरमा २७ रन खर्चेर २ विकेट लिइन्। रुविना क्षेत्रीले ४ ओभरमा १९ रन खर्चेर १ विकेट लिइन्। कविता जोशीले २ र कविता कुँवरले १ विकेट लिइन्।
त्यसअघि बायोमास ओभलमा टस जितेर पहिला ब्याटिङ रोजेको नेपालले निर्धारित २० ओभरमा ६ विकेट गुमाउँदै ११५ रन बनाएको थियो। नेपालकी कप्तान इन्दु बर्मा ३७ बलमा २ चौकासहित सर्वाधिक २९ रन बनाएकी थिइन्। फिनिसर डली भट्टले राम्रो अन्त्य गर्दै १४ बलमा १ चौका र २ छक्कासहित २५ रनको महत्वपूर्ण इनिङ खेलेकी थिइन्।
ओपनर सीता रानामगरलाई ६ रनमा आउट भएकी थिइन्। दोस्रो विकेटका लागि इन्दु र कविताले ३५ रनको साझेदारी गरे। कविता ३१ बलमा २ चौकासहित २३ रन रन आउट हुन पुगेकी थिइन्। रुविना १८ बलमा २ चौकासहित २० रनमा आउट भइन्।
मलेसियाकी महिराह इजाती इस्मालीले ४ ओभरमा १० रन खर्चेर २ विकेट लिइन्। विनिफ्रेड दुराईसिंघमले १ विकेट लिइन्।
यसअघि थाइल्यान्डलाई ४ रनले हराउँदै युएई फाइनलमा पुग्नुको साथै एसिया कपमा पनि छनोट भइसकेको छ। फाइनल आइतबार हुनेछ।
