आर्सनलले इंग्लिस प्रिमियर लिगको शीर्ष स्थानमा उक्लिएको छ। शनिबार भएको खेलमा ब्रेन्टफोर्डलाई २–१ ले हराउँदै आर्सनल शीर्ष स्थानमा उक्लिएको हो।
जितपछि आर्सनलको ६४ अंक भएको छ र कम्तीमा एक दिन पहिलो स्थानमा रहनेछ । उसको पछाडि लिभरपुल ६३ र म्यानचेस्टर सिटी ६२ अंकमा छन्।
उपाधिको छिनोफानो हुन सक्ने लिभरपुल र सिटीबीचको खेल अगाडि आर्सनलले यो जित निकालेको हो।
इमिरेट्समा भएको खेलमा काइ हाभरटेजले ८६ औं मिनेटमा निर्णायक गोल गरे। यसअघि उसले डेक्लेन राइसको गोलले अग्रता लिएको थियो । तर गोलरक्षक आरोन राम्सडेललको भुलमा ब्रेन्टफोर्डको गोल सम्भव भएको थियो र यो योने विसाको नाममा रह्यो ।
शनिबारका अन्य खेलमा म्यानचेस्टर युनाइटेडले एभर्टनलाई २–० र उल्भ्सले फुलहमलाई २–१ ले हरायो । बर्नमाउथ र सेफिल्ड युनाइटेडले २–२ र क्रिस्टल प्यालेस र लुटन टाउनले १–१ को बराबरी खेले ।