सबै खेल 
शनिबार राति ब्रिजटाउनमा जारी टि–२० विश्वकपकै हाइस्कोरिङ म्याच भयो। दुई ठूला टिम अस्ट्रेलिया र इंग्ल्यान्डबीचको हाइस्कोरिङ म्याचमा अस्ट्रेलिया ३६ रनले विजयी भयो।
पहिला ब्याटिङ गर्दै अस्ट्रेलियाले दिएको २०२ रनको लक्ष्य पछ्याएको इंग्ल्यान्डले ६ विकेटको क्षतिमा १६५ रन मात्र बनाउन सक्यो। उसका लागि कप्तान जोश बट्लरले सर्वाधिक ४० रन बनाए। उनले २८ बलमा ५ चौका र २ छक्का प्रहार गरे। यस्तै, फिल सल्टले २३ बलमा ३७ बनाए।
सल्ट र बट्लरले पहिलो विकेटका लागि ७३ रनको साझेदारी गर्दै टिमलाई उत्कृष्ट सुरुआत दिलाएका थिए। यी दुईबाहेक मोइन अलीले १५ बलमा २५, ह्यारी ब्रुक्सले १६ बलमा २० र लिअम लिभिङ्सटनले १२ बलमा १५ रन बनाए।
बलिङमा अस्ट्रेलियाका एडम जाम्पा र पाट कमिन्सले समान २ विकेट लिए।
त्यसअघि पहिला ब्याटिङ गरेको अष्ट्रेलियाले ७ विकेटको क्षतिमा २०१ रन बनायो। उसलाई त्रविस हेठ र डेविड वार्नरले ५ ओभरमा ७० रनको साझेदारी गर्दै उत्कृष्ट सुरुआत दिलाए। वार्नरले २६ बलमा २ चौका र ४ छक्का प्रहार गर्दै ३९ रन बनाए।
यस्तै, हेडले १८माल २ चौका र ३ छक्का मद्दतमा ३४ रन बनाउँदा कप्तान मिचेल मार्सले २५ बलमा समान २ चौका र छक्का प्रहार गर्दै ३५ रन बनाए। मार्कस स्टोइनिसले १७ बलमा ३० रन बनाउँदा ग्लेन म्याक्सेवेलले २५ बलमा २८ र म्याथु वेडले १० बलमा १७ रन बनाए।
बलिङमा इंग्ल्यान्डका क्रिस जोर्डनले २ तथा मोइन अली, जोफ्रा आर्चर, अदिल रसिद र लिभिङ्टनले समान १ विकेट लिए।
समूह बीमा अस्ट्रेलियाको यो लागातार दोस्रो जित हो। यसअघि उसले ओमानलाई हराएको थियो। यता, इंग्ल्यान्ड भने जित बिहीन छ। स्कटल्यान्डसँगको पहिलो खेल वर्षाका कारण रद्द भएको थियो।
