टियू बिबिए कप क्रिकेट आयोजना हुने भएको छ। त्रिभुवन विश्वविद्यालयअन्तर्गत नेपालभरि पढाइ हुने कलेजहरु सहभागी हुने प्रतियोगिता असार १२ गतेबाट आयोजना हुनेछ।
साविक विजेता टिम काठमाडौंकै पब्लिक युथ क्याम्पसको आयोजनामा टियू बिबिए कप क्रिकेट प्रतियोगिता सुरु हुन लागेको हो। प्रतियोगितामा अहिलेसम्मकै धेरै २२ टोली सहभागी हुने आयोजक टोलीले जनाएको छ।
झापाको मेची बहुमुखी क्याम्पस र काठमाडौंकै मोर्डन नेपाल कलेजले पहिलोपटक सहभागिता जनाउन लागेका हुन्। प्रतियोगिताका सम्पूर्ण खेलहरु काठमाडौंको कागेश्वरी मनोहरा नगरपालिकास्थित तल्लो मुलपानी क्रिकेट मैदानमा सञ्चालन हुनेछ।
प्रतियोगिताको उपाधि विजेता टोलीले ९० हजार र उपविजेताले ४० हजार रुपैयाँ पुरस्कार पाउनेछ।
आयोजक इभेन्ट म्यानेजर म्यान क्यान डु का म्यानेजिङ डाइरेक्टर सुनिल थापाका अनुसार वर्षाको सिजन भएकाले एकै दिनमा ३ खेल पनि खेलाउनुपर्ने हुन सक्छ।
प्रतियोगिताको उद्घाटन खेलमा आयोजक पब्लिक युथ क्याम्पस र पिपल्स क्याम्पस खेल्नेछन्।