जारी कोपा अमेरिकामा उरुग्वे र अमेरिकाले विजयी सुरुआत गरेकाछन्। सोमबर बिहान भएको खेलमा उरुग्वेले पानामालाई र अमेरिकाले बोलिभियालाई हराए।
लुइस सुवारेजविनै मैदान उत्रिएको उरुग्वेलाई जित दिलाउन म्याक्सिमिलानो अरौजो, डार्विन नुनेज र मेटिस भिनाले गोल गर्दा पानामाका मिचेल अमिर मुरिलोले गोल गरे।
फ्लोरिडामा भएको खेलमा उरुग्वेले १६औं मिनेटमा अग्रता लियो। मेटिसको पासमा अरौजोले गोल गरेका थिए। पहिलो हाफ १–०मै सकियो।
८५औं मिनेटमा नुनेजले उरुग्वेको अग्रता दोब्बर बनाए। दोस्रो हाफको अतिरिक्त पहिलो मिनेटमा भिनाले गोल गरेपछि उरुग्वे ३–० को सहज अवस्थामा पुग्यो। इन्जुरी समयकै चौथो मिनेटमा मुरिलोले गोल खेललाई ३–१को अवस्थामा ल्याए।
यस्तै अर्को खेलमा अमेरिकाले बोलिभियामाथि २–०को जित निकाल्यो। आयोजक अमेरिकालाई जित दिलाउन कप्तान क्रिस्टियन पुलुसिच र फ्लोरिन बालुगाले गोल गरेका थिए। दुवै गोल पहिलो हाफमा भएको थियो।