डिफेन्डिङ च्याम्पियन अर्जेन्टिना कोपा अमेरिका फुटबलको सेमिफाइनलमा प्रवेश गरेको छ। शुक्रबार बिहान भएको खेलमा इक्वेडरलाई पेनाल्टी सुटआउटमा ४–२ले हराराउँदै अर्जेन्टिना सेमिफाइनलमा स्थान पक्का गरेको हो।
निर्धारित समयको खेल १–१को बराबरीमा सकिएपछि खेल सिधै पेनाल्टी सुटआउटमा गएको थियो। पेनाल्टीमा पुनः एक पटक गोलकिपर इमिलानो मार्टिनेज नायक बन्दा अर्जेन्टिना विजयी भयो।
मार्टिनेजले इक्वेडरका सुरुआती २ पेनाल्टी रोकेका थिए। उनले एन्जेल मिना र एलन मिन्डाको प्रहार रोकेका थिए। उनले अर्जेन्टिनालाई ४ सुपटआउटमा जिताएका छन्।
पेनाल्टीमा अर्जेन्टिनाका लागि जुलियन अल्भारेज, म्याक एलिस्टर, गोन्जोलो मोन्टियल र निकोलस ओटामेन्डीले गोल गर्दा लियोनल मेसी भने गोल गर्नबाट चुके। उनको प्रहार क्रसबारमा लागेको थियो।
यता, इक्वेडरका जोन एबोह र जोर्डी काइसेडोले मात्र गोल गरेका थिए।
त्यसअघि निर्धारित समयमा अग्रता पनि अर्जेन्टिनाले नै लिएको थियो। ३५औं मिनेटमा एलिस्टरको पासमा लिसान्द्राे मार्टिनेजले गोल गरेका थिए।
दोस्रो हाफको सुरुआतमै इक्वडेर बराबरीको राम्रो अवसर गुमाएको थियो। ६२औं मिनेटमा प्राप्त पेनाल्टीमा उसका कप्तान इनर भ्यालेन्सिया गोल गर्नबाट चुके। उनको प्रहार पोस्टमा लागेर फर्किएको थियो।
तर, इन्जुरी समयको पहिलो मिनेटमा इक्वेडरले बराबरी गोल फर्कायो। एबोहको पासमा केभिन रोड्रिगेजले गोल गरेका थिए।
अब अर्जेन्टिनाले सेमिफाइनलमा क्यानडा र भेनेजुएलाबीचको विजेतासँग खेल्नेछ।