कोलम्बिया कोपा अमेरिका फुटबलको फाइनलमा प्रवेश गरेको छ। बिहीबार बिहान भएको खेलमा उरुग्वेमाथि १–०को जित निकाल्दै कोलम्बिया फाइनलमा पुगेको छ।
पछिल्लो २ वर्षयता उत्कृष्ट फर्ममा रहेको कोलम्बिया २३ वर्षपछि फाइनलमा पुगेको छ। ऊ २८ खेलयता अपराजित छ।
कोलम्बियालाई जित दिलाउन जेफेर्सन लेर्माले ३९औं मिनेटमा गोल गरे। उनले कप्तान जेम्स रोड्रिगेजको पासमा गोल गरेका थिए। त्यसपछि खेलमा गोल नहुँदा कोलम्बिया विजयी भयो।
पहिलो हाफकै इन्जुरी समयमा कोलम्बिया १० खेलाडीमा समेटियो। उसका डिफेन्डर डानियल मुनोज दोहोरो पहेँलो कार्ड खाँदै मैदानबाट बाहिरिएका थिए। तर, त्यसपछि खेलमा उरुग्वेले पूर्ण रुपमा पकड बनाए पनि गोल भने गर्न सकेन।
अब कोलम्बियाले सोमबार बिहान हुने फाइनलमा अर्जेन्टिनाको सामना गर्नेछ। अर्जेन्टिना क्यानडालाई २–०ले हराउँदै फाइनल पुगेको थियो।