स्पानिस ला लिगामा एट्लेटिको मड्रिड बराबरीमा रोकिएको छ। बुधबार राति भएको मिडविक गेममा एट्लेटिको क्लब स्पान्योलसँग गोलरहित बराबरीमा रोकिएको हो।
खेलमा स्पान्योलमाथि पूर्ण रुपमा दबाब बनाए पनि एट्लेटिकोले गोल भने गर्न सकेन। उनले ६३ प्रतिशत बल पोजेसन बनाउँदै स्पान्योलको पोस्टमा २५ सट प्रहार गरेको थियो, जसमा ७ सट फ्रेममा थियो। यता, स्पान्योलले ८ सट प्रहार गर्दा १ सट मात्र फ्रेममा थियो।
नयाँ सिजन एट्लेटिकोको यो दोस्रो बराबरी हो। तीन खेल खेलिसकेको एट्लेटिको ५ अंकसहित चौथो स्थानमा उक्लेको छ।
यस्तै, अर्को खेलमा एथ्लेटिक बिल्बाओ विजयी भएको छ। बुधबार राति नै भएको खेलमा उसले भ्यालेनिसयामाथि १–०को जित निकाल्यो। उसका लागि बेनट प्राडोसले गोल गरेका थिए।
यता, रियल सोसिडाड अलाभेससँग २–१ले पारजित भएको छ भने रियल भालाडोलिड र लेगानेसले गोलरहित बराबरी खेलेका छन्।