स्पेनिस ला लिगामा एट्लेटिको मड्रिड विजयी भएको छ। बिहीबार राति भएको खेलमा जुलियन अल्भारेजको निर्णायक गोल मद्दतमा एट्लेटिकोले सेल्टाभिगोलाई १–०ले हरायो।
खेलमा घरेलु टोली सेल्टाभिगोले दबाब बनाएको थियो। तर, बराबरीतर्फ उन्मूख खेलको अन्तिम मिनेटमा अल्भारेजले गोल गर्दै एट्लेटिकोलाई ३ अंक दिलाए। उनले एन्टोइन ग्रिजमनको पासमा गोल गरेका थिए।
यसैसिजन म्यान्चेस्टर सिटीबाट एट्लेटिको आएका अल्भारेजको यो एट्लेटिकोमा दोस्रो गोल हो।
खेलमा सेल्टाले ५८ प्रतिशत बल पोजेसन बनाउँदै १० सट प्रहार गरेकोमा ४ सट फ्रेममा थियो। यता, एट्लेटिकोले ८ मध्ये २ सट मात्र टार्गेटमा राख्न राखेको थियो।
जितपछि एट्लेटिको १५ अंकसहित तस्रो स्थानमा छ भने सेल्टा ९ अंकसहित सातौं स्थानमा छ।
अर्को खेलमा भिल्लारियलले इस्पानियोलाई २–१ले हरायो। खेलमा पहिलो अग्रता इस्पानियोलले लियो। पहिलो हाफको इन्जुरी समयको पहिलो मिनेटमा जोफ्रे कारोरसले गोल गरेका थिए।
तर, इन्जुरी समयकै छैठौं मिनेटमा भिल्लारियलले बराबरी गोल फर्कायो। उसका एयोज पेरेजले गोल गरेका थिए। त्यसपछि ६३औं मिनेटमा पेरेजले नै गोल गरेपछि भिल्लारियल २–१ले विजयी भयो।
भिल्लारियल १४ अंकसहित चौथो स्थानमा छ भने इस्पानियोल ७ अंकसहित १४औं स्थानमा छ।