भुटान काठमाडौंमा जारी महिला साफ च्याम्पियनसिपको सेमिफाइनलमा प्रवेश गरेको छ । बिहीबार दिउँसो दशरथ रंगशालामा भएको खेलमा माल्दिभ्सको पोस्टमा गोलको वर्षा गर्दै भुटानले समूह बीबाट सेमिफाइनलमा स्थान पक्का गरेको हो।
भुटानले माल्दिभ्समाथि १३–०को फराकिलो जित निकाल्यो। भुटानका लागि देकी लाजोम ५ गोल गरिन् भने कप्तान पेमा छोडेन छिरिङ र छिरिङ यान्डेले समान २ गोल गर्दा सोनाम छोडेन, नाम्ग्याल देमा, देकी याङडोन र छिरिङ लाडेनले पनि गोल गर्न भ्याए।
जितपछि भुटानले ३ खेलबाट ७ अंक भएको छ। उसको शीर्ष २ पक्का भएको छ।
अब केहीबेरपछि सुरु हुने नेपाल र श्रीलंकाबीचको खेलपछि समूह बीको अन्तिम खेलपछि विजेता र उपविजेताको टुंगो लाग्नेछ। श्रीलंकालाई ६ गोलअन्तरमा पराजित गरे नेपाल समूह विजेता बन्ने पक्का हुनेछ, अन्यथा भुटान समूह विजेता बन्ने छ।
श्रीलंकाले नेपाललाई हराएमा भने भुटान समूह विजेता र श्रीलंका उपविजेता बन्ने छ।