महेन्दै धोनीले १९ वर्ष लामो आईपीएल खेलाडी करियर अन्त्य गर्दै चेन्नई सुपर किंग्सको मेन्टरको जिम्मेवारी सम्हाल्ने भएका छन्। आगामी आईपीएल २०२७ का लागि चेन्नई सुपर किंग्सले धोनीलाई टोलीको मेन्टर नियुक्त गरेको घोषणा गरेको छ।
आगामी डिसेम्बर १६ मा गोवामा हुने खेलाडी लिलामीअघि खेलाडीलाई रिलिज तथा रिटेन गर्ने समयसीमा सकिनुभन्दा तीन घण्टाअघि मंगलबार फ्रेन्चाइजले यो घोषणा गरेको हो।
धोनीले यसअघि धेरैपटक चेन्नईका उत्साही समर्थकले भरिने चेपक मैदानमा खेल्दै आफ्नो आईपीएल करियर अन्त्य गर्ने इच्छा व्यक्त गरेका थिए। तर अब उनले खेलाडीका रूपमा त्यस्तो बिदाइ पाउने छैनन्।
चेन्नई सुपर किंग्सका मालिक एन श्रीनिवासनले एक विज्ञप्तिमा भनेका छन्, “एमएस धोनीबिना सीएसकेको अस्तित्व नै छैन। झन्डै दुई दशकदेखि हामीले सफलता, असफलता र हरेक उतारचढावमा एकअर्कासँगै यात्रा गरेका छौँ। हाम्रो सम्बन्ध बलियो हुनुको एउटा मात्र कारण छ—हामी एकअर्काको नियतमाथि कहिल्यै प्रश्न उठाउँदैनौँ। यही विश्वासले यो यात्रा सम्भव बनाएको हो।
सन् २००८ मा मैले धोनीलाई सीएसकेको हिस्सा बनाउन जोड दिएको थिएँ। त्यो मेरो जीवनकै उत्कृष्ट निर्णय साबित भयो। फ्रेन्चाइजका लागि उनले हासिल गरेका उपलब्धिका कारण मात्र होइन, उनी कस्तो व्यक्ति हुन् भन्ने कारणले पनि। धोनी सधैँ हाम्रो पहिचानको हिस्सा रहनेछन्। यो सधैँ उनको घर हुनेछ।”
४५ वर्षीय धोनी आईपीएल २०२७ का लागि पुनर्गठन गरिएको चेन्नईको प्रशिक्षण टोलीमा आबद्ध हुनेछन्। टोलीमा मुख्य प्रशिक्षक जाहिर खान, सहायक प्रशिक्षक एलबि मोर्केल, गारेथ ब्याटी र श्रीधरन श्रीराम, बलिङ प्रशिक्षक मोहित शर्मा तथा फिल्डिङ प्रशिक्षक जेम्स फोस्टर रहनेछन्।
लगातार तीन सिजन प्लेअफमा पुग्न असफल भएपछि चेन्नईले आईपीएल २०२७ का लागि आफ्नो प्रशिक्षक टोलीमा व्यापक परिवर्तन गरेको हो।
धोनी चेन्नईका पहिलो सुपर किंग हुन्। सन् २००७ को टी–२० विश्वकपमा भारतलाई उपाधि दिलाएपछि सन् २००८ को पहिलो आईपीएल खेलाडी लिलामीमा चेन्नईले उनलाई १५ लाख अमेरिकी डलरमा अनुबन्ध गरेको थियो।
त्यसपछि उनको कप्तानीमा चेन्नईले सन् २०१०, २०११, २०१८, २०२१ र २०२३ गरी पाँचपटक आईपीएल उपाधि जितेको थियो। त्यस्तै, सन् २०१० र २०१४ मा दुईपटक च्याम्पियन्स लिगको उपाधिसमेत जितेको थियो।
चेन्नई लगातार दुईपटक आईपीएल उपाधि जित्ने पहिलो टोली बनेको थियो। साथै, एउटै वर्ष आईपीएल र च्याम्पियन्स लिग दुवैको उपाधि जित्ने पहिलो टोली पनि चेन्नई नै बनेको थियो।
