सबै खेल 
कमलसिंह ऐरीले अलराउन्डर प्रदर्शन गरेपछि प्रधानमन्त्री कप एकदिवसीय क्रिकटमा विभागीय टिम एपिएफले लगातार दोस्रो जित निकालेको छ। बिहीबार लमहीमा भएको खेलमा कमलको बल र ब्याट दुवै चलेपछि एपिएफले मधेश प्रदेशमाथि २ विकेटको जित निकाल्यो।
मधेशले दिएको १६९ रनको मध्यम लक्ष्य एपिएफले ३६.५ ओभरमा ८ विकेटको क्षतिमा भेट्टायो। उसका लागि सुमित महर्जनले ३५, आसिफ सेखले ३४ रन बनाउँदा नवौं नम्बरमा ब्याटिङका लागि आएका कमलले ३१ बलमा ३ छक्का प्रहार गर्दै नटआउट २८ रन बनाए।
एपिएफलाई दबाबमा राख्ने क्रममा मधेशका कमल गुप्ताले ४ विकेट लिए भने प्रदीप पासवानले २ विकेट लिए।
त्यसअघि पहिला ब्याटिङ गरेको मधेशले ४०.४ ओभरमा अलआउट हुँदै १६८ रन बनायो। उसका पवन सर्राफले पुनः उत्कृष्ट ब्याटिङ गरे। अघिल्लो खेलमा ९४ रन बनाएका उनले एपिएफविरुद्ध ७७ बलमा ८ चौका र ५ छक्का मद्दतमा ७७ रन बनाए। अन्य ब्याट्सम्यानले साथ नदिँदा मधेश सस्तैमा समेटियो।
मधेशको इनिङ धरासायी बनाउने क्रममा कमलले ४ विकेट लिए भने भुवन कार्की र रोहित पौडेलले समान २ विकेट लिए।
एपिएफले पहिलो खेलमा बागमती प्रदेशलाई हराएको थियो। मधेशको यो पहिलो हार हो। उसले पहिलो खेलमा कोशी प्रदेशलाई हराएको थियो।
