स्पिनर मेहिदी हसन मिराज र शकिब अल हसनले एकआपसमा ७ विकेट लिएपछि बंगलादेशले पहिलो टेस्टमा आइतबार रावलपिन्डीमा पाकिस्तानलाई १० विकेटले पराजित गरेको छ । पाकिस्तानमाथि बंगलादेशको टेस्ट क्रिकेटमा यो पहिलो विजय हो ।
मेहिदीले २१ रन खर्चेर ४ र शकिबले ४४ रन खर्चेर ३ विकेट लिएपछि घरेलु टोली पाकिस्तान पाँचौं तथा अन्तिम दिनको खेलमा ५५।५ ओभरमा १ सय ४६ रनमा अलआउट भयो ।
त्यसपछि बंगलादेशलाई विजयका लागि आवश्यक ३० रन जाकिर हसन र सदमान इस्लामले ६.३ ओभरमा जोडेका थिए । विजयी चौका प्रहार गरेका जाकिर १५ र सदमान ९ रन बनाई अविजित रहे । विजयपछि बंगलादेशका खेलाडीले मैदानमै ठूलो खुसी मनाएका थिए ।
मोहम्मद रिजवानले पाकिस्तानबाट दोस्रो इनिङ्समा सर्वाधिक ५१ रन बनाए । उनले ६ चौका प्रहार गरे । घरेलु टोली भोजनको समयमा १०८–६ को स्थितिमा पुगिसकेपछि नै पराजतर्फ उन्मुख भएको थियो ।
बिदाको दिन मैदान पुगेका झन्डै ५ हजार दर्शकले पाकिस्तानले टेस्ट बराबरी गर्न आशा राखेका थिए । तर मेहिदीले लगातार दुई ओभरमा अन्तिम दुई ब्याटर रिजवानलाई बोल्ड र अन्तिम ब्याटर मोहम्मद अलीलाई शून्यमा एलबीडब्लू आउट गरेर बंगलादेशलाई ऐतिहासिक विजय दिलाए।
टेस्ट क्रिकेटमा खासै जित्न नजानेको भनेर बंगलादेशको आलोचना हुँदैं आएको छ । तर अहिले टोलीले अस्ट्रेलिया, इंग्ल्यान्ड र पाकिस्तानलाई पराजित गरिसकेको छ । १ सय ४३ टेस्ट खेल्नेक्रममा बंगलादेशले छैटौं टेस्ट विजय हात पारेको हो ।
पाकिस्तानले घरेलु मैदानमा खेलेको पछिल्ला ९ टेस्टमा ५ मा पराजय भोगेको छ भने ४ बराबरीमा रोकिएको छ । पाकिस्तानले बंगलादेशविरुद्धको यसअघिका १३ मध्येको १२ टेस्ट जितेको थियो, त्यसमा ६ टेस्ट इनिङ्सका आधारमा जितेको थियो । एउटा टेस्ट बराबरी भएको थियो।
यस पराजयपछि पाकिस्तान ९ टोली सम्मिलित विश्व टेस्ट च्याम्पियनसिपमा आठौं स्थानमा झरेको छ भने बंगलादेश छैटौं स्थानमा आएको छ । दोस्रो तथा अन्तिम टेस्ट शुक्रबारदेखि रावलपिन्डीमै हुनेछ ।