मलेसियाविरुद्ध क्यान–११ विजयी

विश्वकप लिग दुई शृंखलाको तयारीमा रहेका नेपाली खेलाडी सम्मिलित नेपाल क्रिकेट संघ (क्यान) प्रेसिडेन्ट ११ ले मलेसियन टोलीसँगको मैत्रीपूर्ण खेलमा जित हात पारेको छ । क्यान प्रेसिडेन्ट ११ ले सोमबार पोखरामा भएको खेलमा मलेसिया सेक्रेटरी ११ लाई १३४ रनले पराजित गरेको हो ।

पोखरा क्रिकेट मैदानमा पहिले ब्याटिङ गरेको क्यान प्रेसिडेन्ट ११ ले ४७ ओभरमा सबै विकेट गुमाउनुअघि २७६ रनको योगफल तय गरेको थियो । जबाफी ब्याटिङमा आएको मलेसियन टोली ३७.२ ओभरमा १४२ रनमै समेटिन पुग्यो ।

क्यान प्रेसिडेन्ट ११ का लागि मोहम्मद आरिफ सेखले १०१ रनको शतकीय योगदान दिए । रिटायर्ड आउट लिएका उनले १०५ बलमा पाँच छक्का र सात चौका प्रहार गरेका थिए । उनीपछि सन्दीप जोराले ५८ रनको अर्धशतकीय योगदान दिए ।

करण केसीले २५, कप्तान ज्ञानेन्द्र मल्लले १९, पारस खड्काले १५, कुशल मल्लले १४ र सुवास खकुरेलले १२ रन योगदान दिए । मलेसियन टोलीलाई सस्तो योगफलमा समेट्न करण र कमलसिंह ऐरीले समान तीन विकेट लिए । कुशल मल्लले दुई विकेट लिए ।

मलेसियन टोलीका लागि अइनुल हक्विम र सेइद अजिजले समान २८ रन योगदान दिए । अन्य खेलाडीले उल्लेख्य योगदान गर्न सकेनन् । बलिङतर्फ पवनदीप सिंह र मोहम्मद आरीले समान तीन विकेट लिए ।

Facebook Comments Box

Leave a Reply

Your email address will not be published.