इन्डियन प्रिमियर लिग (आईपीएल)मा पञ्जाब किंग्सले प्रभावशाली जित निकालेको छ। आइतबार राति भएको खेलमा पञ्जाबले लखनउ सुपर जायन्ट्समाथि ३७ रनको प्रभावशाली जित निकाल्यो।
धर्मशालामा भएको यो खेलमा पञ्जाबले उत्कृष्ट ब्याटिङ र बलिङ प्रदर्शन गर्दै प्लेअफको आशा बलियो बनाएको छ। लखनउको भने यो हारले सिजनको छैटौँ हारका साथ प्लेअफ सम्भावना कमजोर बनेको छ।
पञ्जाबले दिएको २३७ रनको ठूलो लक्ष्य पछ्याएको लखनउले ७ विकेको क्षतिमा १९९ रन मात्रै बनाउन सक्यो । उसका लागि आयुष बधोनीले ४० बलमा ७४ रनको पारी खेले भने अब्दुल समदको ४५ रन बनाए। अन्यले भने गतिलो योगदान दिन सकेनन्।
बलिङमा पञ्जाबका अर्शदीप सिंहले ३ विकेट लिए। उनले लनखउका सुरुअती तीन विकेट लिएका थिए। यस्तै, अज्मतुल्लाह ओमरजाइले २ विकेट लिए।
त्यसअघि पहिला ब्याटिङ गरेको पञ्जाबले ५ विकेटको क्षतिमा २३६ रन बनायो। उसका लािग प्रभसिम्रन सिंहले ४८ बलमा ६ चौका र ७ छक्का मद्दतमा ९१ रन बनाए। यस्तै, श्रेयस ऐयरले ४५ रन बनाउँदा सशांक सिंहले ३३ रनको इनिङ खेले।
बलिङमा लखनउका डेब्यू खेलाडी आकाश सिंह र दिग्वेस राठीले समान २ विकेट लिए।
यो जितसँगै पञ्जाब ११ खेलबाट १५ अंक जोडेर दोस्रो स्थानमा उक्लिएको छ। लखनउ भने ११ खेलमा १० अंकसहित सातौं स्थानमा छ। उसको प्लेअफ यात्रा कठिन बनेको छ।