सन्दीपलाई जमैकाले १ करोडमा किन्यो

चर्चित फ्रेन्चाइ क्रिकेट प्रतियोगिता क्यारेबियन प्रिमियर लिग (सिपिएल)को नयाँ संस्करणमा नेपाली युवा लेगस्पिनर सन्दीप लामछिाने एक करोड रुपैयाँमा बिक्री भएका छन् ।

ड्राफ्टबाट जमैका तलैवाजले सन्दीपलाई ९० हजार अमेरिकी डलर अर्थात् १ करोड ७ लाख रुपैयाँमा क्लबमा भित्र्याएको हो । सिपिएलको नयाँ संस्करणको ड्राफ्ट असार १० गते नै अनलाइनमार्फत गरिएको थियो । सो ड्राफ्ट सोमाबार सर्वाजनिक गरिएको हो ।

जमैकाले सन्दीपलाई लिएसँगै सन्दीपले लगातार तेस्रो सिजन सिपिएल खेल्ने पक्का भएको भएको छ । पहिलो सिजन सन्दीपले सेन्ट किट्स एण्ड नेभिस प्याट्रिओट्सबाट खेलेका थिए भने दोस्रो सिजनमा उनी बार्बादोस ट्राइडेन्समा आबद्ध थिए ।

जमैकाको नेतृत्व स्टार अलराउन्डर आन्द्रे रसेलले गर्ने छन् । जमैकामा रसेलको अलावा कार्लोस ब्रेथवेट, चेटविक वाल्टन, तब्रिज साम्सी, आसिफ अली ओसाने थोमस लगायत खेलाडी छन् ।

विश्वका सबै फ्रेन्चाइज लिगमा आफ्नो प्रभाव छाडिसकेका सन्दीपको यो दोस्रो महँगो अनुबन्धन हो भने सिपिएलको सर्वाधिक महँगो । उनी सर्वाधिक महँगो मूल्यमा नयाँ फम्र्याटको प्रतियोगिता द हन्ड्रेटमा १ लाख पाउण्ड अर्थात् १ करोड ४७ लाख रुपैयाँमा बिक्री भएका छन् । यही जुलाईमा इंग्ल्यान्डमा हुने भनिएको प्रतियोगिता कोरोना भाइरसका कारण १ वर्ष पछि सरेको छ ।

ड्राफ्टमा सन्दीप चौथो महँगो क्याटगोरीमा थिए । सन्दीपसँगै डिजिटल ड्राफ्टमा २३ देशका ५३७ खेलाडी थिए । अघिल्लो सिजन सन्दीप बार्बादोसमा ७० हजार डलरमा अनुबन्धित भएका थिए ।

सन्दीपले सिपिएलका दुई सिजनमा उत्कृष्ट प्रदर्शन गरेका छन् । दुई संस्करणमा गरी उनले कुल १५ विकेट लिएका छन् । उनले प्याट्रिओट्सबाट ५ खेलमा ७ विकेट र बार्बादोसबाट ६ खेलमा ८ विकेट लिएका थिए । च्याम्पियन बार्बादोसबाट सन्दीपले अघिल्लो सिजन सिपिएल आधा मात्र खेलेका थिए।

सन् २०१९मा टि–२० क्रिकेटमा सर्वाधिक विकेट लिने खेलाडी बनको सन्दीपले आईपिए, बिग बास लिग, पाकिस्तान सुपर लिग, अफगानिस्तान प्रिमियर लिग, टि–१० लिग, बंगलादेश प्रिमियर लिग खेलिसकेका छन् । सन्दीप टि–२० क्रिकेटमा १ सय विकेट लिने पहिलो नेपाली खेलाडी हुन् ।

वेस्टइन्डिजका विभिन्न देशमा हुँदै आएको सिपिएल कोरोना भाइरसका कारण यो पटक ट्रिनिडाड एण्ड टोबागोमा मात्र हुने छ । प्रतियोतिगामा अगस्त १८ देखि सेप्टेम्बर १० सम्म हुने छ । प्रतियोगिताको लागि सरकाससँग अनुमति लिन भने बाँकी छ ।

Facebook Comments Box

Leave a Reply

Your email address will not be published.