प्रधानमन्त्री ओली भन्छन्– साफ च्याम्पियनसिप नेपालमै आयोजना हुन्छ

प्रधानमन्त्री केपी ओलीले साफ च्याम्पियनसिप फुटबल प्रतयोगिताम नेपालमै आयोजना हुने बताएका छन् । प्रधानमन्त्री निवास बालुवाटारमा आइतबार ट्राइ नेसन्स कप फुटबल प्रतियोगिताको उपाधि विजेता राष्ट्रिय फुटबल टोलीका खेलाडी तथा प्रशिक्षकलाई पुरस्कार तथा सम्मानपत्र वितरण कार्यक्रममा उनले साफ फुटबल नेपालमा आयोजना गरिने बताए ।

उलने साफ च्याम्पियनसिप आयोजनाको तयारी थाल्न अखिल नेपाल फुटबल संघ (एन्फा) र राष्ट्रिय खेलकुद परिषद् (राखेप)लाई निर्देशन पनि दिए । सो क्रममा प्रधानमन्त्री ओलीले नेपाली टोलीलाई जित्ने उद्देश्यका साथ अभ्यास गर्न सुझाव दिए ।

आयोजक बंगलादेशले प्रतियोगिताबाट हात झिकेपछि नेपालमा साफ आयोजना गर्न एन्फाले प्रस्ताव अघि बढाएका सन्दर्भमा प्रधानमन्त्री ओलीले उपाधि जित्नका लागि कडा मेहनत आवश्यक भएकाले नेपाली टोलीलाई जित्ने लक्ष्य लिएर मैदानमा उत्रिन आग्रह गरे । ‘हामी साफ आयोजना गर्न सक्छौं, मनोबल उच्च बनाउनुस्’, उनले भने ।

यसअघि साफ यस वर्ष बंगलादेशमा आयोजना हुने तय गरिएको थियो । प्रतियोगिता सेप्टेम्बर १४ देखि २५ तारिखसम्म गर्ने तय भए पनि बंगलादेशले अन्तिम समयमा कोरोना भाइरस महामारीलगायत कारण आयोजना गर्न नसक्ने जनाएको थियो । बंगलादेशले प्रतियोगिताको आयोजनाबाट हात झिकेपछि नेपाल र श्रीलंकाले साफ फुटबल आयोजना गर्न दाबी गरेका छन् ।

गत वर्ष चैतमा सम्पन्न ‘थ्री नेसन्स कप’ को फाइनल खेलको दशरथ रंगशालामा प्रत्यक्षरुपमा अवलोकन गरेको सम्झना गर्दै प्रधानमन्त्री ओलीले कद होचो भए पनि मनोबल उच्च भएकाले नेपाली टोलीले बंगलादेशसितको फाइनल खेल जित्नेमा आफू त्यतिबेलै आशावादी भएको बताए ।

देशको विकास हुनका लागि खेलकुदको मात्र नभइ चौतर्फी विकास आवश्यक भएको उनको भनाइ थियो । सो अवसरमा प्रधानमन्त्री ओलीले नेपाली टोलीका खेलाडी र प्रशिक्षकलाई नगदसहित खादा ओढाइ सम्मानपत्र प्रदान गरेका थिए ।

नेपाल, बंगलादेश र किर्गिस्तानबीचको ‘थ्री नेसन्स कप’ गत वर्ष चैत १० देखि १६ गतेसम्म नेपालमा सञ्चालन भएको थियो । प्रतियोगिताको फाइनलमा नेपालले बंगलादेशलाई २–१ गोलअन्तरले हराउँदै उपाधि जितेको थियो ।

Facebook Comments Box