एनभिए भलिबल : महिलातर्फ एपीएफ र न्यु डायमन्ड विजयी

विभागीय टोली एपीएफ र न्यु डायमन्ड स्पोर्ट्स क्लबले राजधानीमा जारी छैटौं संस्करणको एनभीए महिला तथा पुरुष क्लब भलिबल च्याम्पियनसिपअन्तर्गत महिलातर्फको खेलमा आज जित निकालेका छन्।

त्रिपुरेश्वरस्थित दशरथ रंगशालामा भएको खेलमा एपीएफले ढोरपाटन स्पोर्ट्स क्लबमाथि ३-० को सोझो सेटमा जित निकाल्दा न्यु डायमन्डले एभरेस्ट भलिबल ट्रेनिङ क्लबलाई पनि ३(० को सोझो सेटमा पराजित गरेको हो।

न्यु डायमन्डसामू निकै निरीह बनेको एभरेस्टले पहिलो सेट २५-६, दोस्रो सेट २५-५ र तेस्रो सेट २५-१३ ले गुमाएको थियो। यो जितसँगै न्यु डायमन्डले जारी प्रतियोगितामा विजयी सुरुआत गरेको हो।

प्रतियोगिताअन्तर्गत मंगलबारकै अर्को खेलमा विभागीय टोली एपीएफले ढोरपाटन स्पोर्ट्स क्लबमाथि सहज जित निकालेको हो। राष्ट्रिय टिमका खेलाडीले भरिएको एपीएफले ढोरपाटनमाथि २५-११, २५(७ र २५(६ को जित निकालेको हो। यससँगै एपीएफले पनि जारी प्रतियोगितामा विजयी सुरुआत गरेको छ।

प्रतियोगितामा भोलि महिलातर्फ ढोरपाटन स्पोर्ट्स क्लब र नेपाल पुलिस तथा दोस्रो खेल एभरेस्ट भलिबल ट्रेनिङ क्लब र त्रिभुवन आर्मी क्लबबीच खेल हुनेछ।

Facebook Comments Box