किलियन एम्बाप्पेले उत्कृष्ट प्रदर्शन गरेपछि स्पेनिस ला लिगामा रियल मड्रिडले सानदार जित निकालेको छ। आइतबार राति भएको खेलमा एम्बाप्पेले २ गोल गरेको खेलमा रियलले १० खेलाडीमा समेटिएको लस पाल्मसमाथि ४–१को सानदरा जित निकाल्यो।
घरेलु मैदान सान्टियायो बर्नाबेउमा रियललाई जित दिलाउ एम्बाप्पेका अलावा ब्राहिम डियाज र रोड्रीगोले गोल गरे। रियलका तीन गोल भार मार्फत क्यान्सिल भएको थियो। यता, पाल्मसका फाबियो सिल्भाले गोल गरेका थिए।
खेलमा अग्रता भने पाल्मसले लियो। उसका सिल्भाले २७औं सेकेन्डमै गोल गरेका थिए। तर, त्यसपछि भने रियलले खेलमा दबाब बनायो। १८औं मिनेटमा एम्बाप्पेले पेनाल्टीमा गोल गर्दै रियललाई खेलमा फर्काए।
त्यसपछि ३ मिनेट अन्तरमा २ गोल गर्दै रियलले खेलमा पूर्ण रुपमा पकड बनायो। उसका डियाजले ३३औं मिनेटमा गोल गर्दै टिमलाई पहिलो पटक अग्रता दिलाए। त्यसपछि ३६औं मिनेटमा एबाप्पेले नै गोल गरेपछि रियलले पहिलो हाफमा ३–१को अग्रता लियो।
५७औं मिनेटमा रोड्रिगोले रियलका लागि चौथो गोल गरे। ६४औं मिनेटमा बेनिटो रामिरेजले रातो कार्ड पाएपछि पाल्मस १० खेलाडीमा समेटियो। त्यसपछि रियलले थप दबाब सिर्जना गरेपनि गोल भने गर्न सकेन। थप गोल नहुँदा रियल ४–१ले विजयी भयो।
यो जितसँगै रियल शीर्ष स्थानमा फर्किएको छ। २० खेलमा रियलको ४६ अंक भएको छ। दोस्रो स्थानको एट्लेटिको मड्रिडको ४४ र तेस्रो स्थानको बार्सिालेनाको ३९ अंक छ। यता, पाल्मस भने २२ अंकसहित १४औं स्थानमा छ।
अर्को खेलमा एथ्लेटिक क्लबले सेल्टाभिगोमाथि २–१को जित निकाल्दा पुछारको भ्यालेन्सियाले रियल सोडिडाडलाई १–०ले हरायो। ओसासुना र रायो भालेकानोले १–१को बराबरी खेले।