च्याम्पिन्यस लिगमा पिएसजीले पेप ग्वार्डिओलाको टिम म्यान्चेस्टर सिटीमा उत्कृष्ट पुनरागमन जित निकालेको छ। बुधबार राति पेरिसका भएको खेलमा २ गोलले पछि परेको अवस्था उल्टाउँदै पिएसजीले सिटीमाथि ४–२को जित निकाल्यो।
खेलमा पिएसजीका लागि उसमान डेम्बेले, ब्राड्ली बार्कोला, जोआ नेभेस र गोन्सालो रामोसले गोल गरेका थिए। सिटीका ज्याक ग्रेलिस र अर्लिङ हालान्डले गोल गरेका थिए।
खेलको पहिलो हाफ गोलरहित बराबरीमा सकियो। तर, दोस्रो हाफको १५ मिनेटमा ४ गोल भएको थियो। ५०औं मिनेटमा ग्रेलिसको गोलमा सिटीले अग्रता लियो। ५३औं मिनेटमा हालान्डले सिटीको अग्रता दोब्बर बनाए।
सिटीले ३ मिनेटमा २ गोल गरेको थियो। त्यसको जवाफ पिएजीले सोही पारामा दियो। उसले ४ मिनेट अन्तरमा २ गोल गर्दै खेलालाई २–२को बराबरीमा ल्याएको थियो। उसका लागि ५६औं मिनेटमा डेम्बेले र ६०औं मिनेटमा बार्कोलाले गोल गरेका थिए।
खेलालाई बराबरीमा ल्याएपछि सिटीमाथि पिएसजी पूर्ण रुपमा हावी भएको थियो। नेभेसले ७८औं मिनेटमा गोल गर्दै पिएसजीलाई खेलमा अग्रता दिलाए। त्यसपछि इन्जुरी समयको तेस्रो मिनेटमा रामोसले गोल गरेपछि पिएसजी ४–२ले विजयी भयो।
जितसँगै पिएसजी ७ खेलमा १० अंक जोड्दै २२औं स्थानमा उक्लिएको छ। उसको अन्तिम १६को प्लेअफ सम्भावना बलियो बनेको छ।
यता, सिटी ८ अंकसहित २५औं स्थानमा छ। ऊ समूह चरणबाटै बाहिरिने खतरा बढेको छ। अब उसलाई प्लेअफ पुग्ने अन्तिम खेल जित्नै पर्ने छ भने १० अंक रहेका स्टुटगार्ड, स्पोटिङ, पिएसजी र बेन्फिका मध्ये एक टिमले अन्तिम खेल हार्नुपर्ने छ। यी चारैमध्ये १ टिमले बराबरी खेले सिटीको प्लेअफ निर्णय गोलअन्तरमा हुनेछ।